దర్వేశిపురంలో వైభవంగా శ్రీ రేణుక ఎల్లమ్మ బ్రహ్మోత్సవాలు – అమ్మవారిని దర్శించుకున్న మంత్రి కోమటిరెడ్డి వెంకట్ రెడ్డి

చీకటి వెలుగు నల్లగొండ,

నల్లగొండ నియోజకవర్గంలోని కనగల్ మండలం దర్వేశిపురం గ్రామంలో నిర్వహిస్తున్న శ్రీ రేణుక ఎల్లమ్మ బ్రహ్మోత్సవాలు అత్యంత వైభవంగా కొనసాగుతున్నాయి. ఉత్సవాల్లో భాగంగా రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి మంగళవారం ఆలయాన్ని సందర్శించి అమ్మవారిని దర్శించుకుని ప్రత్యేక పూజలు నిర్వహించారు.
అమ్మవారి కళ్యాణోత్సవం సందర్భంగా దేవాలయం నుంచి కళ్యాణ మండపం వరకు మేళతాళాలు, భక్తుల జయజయధ్వానాల నడుమ పట్టు వస్త్రాలను ఘనంగా తీసుకెళ్లి అమ్మవారికి సమర్పించారు. అనంతరం శ్రీ రేణుక ఎల్లమ్మ–జమదగ్ని మహర్షి కళ్యాణ మహోత్సవంలో మంత్రి పాల్గొని ప్రత్యేక ప్రార్థనలు చేశారు.
ఈ సందర్భంగా మంత్రి మాట్లాడుతూ రాష్ట్ర ప్రజలందరూ సుఖసంతోషాలతో, ఆయురారోగ్యాలతో జీవించాలని అమ్మవారిని ప్రార్థించినట్లు తెలిపారు. గ్రామీణ ప్రాంతాల్లో ఆధ్యాత్మిక, సాంస్కృతిక సంప్రదాయాలను పరిరక్షించడంలో ఇలాంటి ఉత్సవాలు కీలక పాత్ర పోషిస్తున్నాయని పేర్కొన్నారు. ఆలయ అభివృద్ధికి అవసరమైన సహకారం అందించేందుకు తాను ఎల్లప్పుడూ కట్టుబడి ఉంటానని హామీ ఇచ్చారు.
బ్రహ్మోత్సవాల్లో భాగంగా నిర్వహించిన వివిధ ధార్మిక కార్యక్రమాలు భక్తులను విశేషంగా ఆకట్టుకున్నాయి. వేలాది మంది భక్తులు ఉత్సవాల్లో పాల్గొని అమ్మవారి ఆశీస్సులు పొందారు. కళ్యాణోత్సవం ఆధ్యాత్మిక వాతావరణంలో భక్తి శ్రద్ధల మధ్య ఘనంగా సాగింది.
ఈ కార్యక్రమంలో స్థానిక ప్రజాప్రతినిధులు, గ్రామ పెద్దలు, ఆలయ కమిటీ సభ్యులు, భక్తులు పెద్ద సంఖ్యలో పాల్గొన్నారు. మంత్రికి ఆలయ కమిటీ సభ్యులు ఘన స్వాగతం పలికారు. బ్రహ్మోత్సవాలను విజయవంతంగా నిర్వహిస్తున్న ఆలయ కమిటీ సభ్యులు, గ్రామస్తులు, సేవకులను మంత్రి అభినందించారు.
దర్వేశిపురం గ్రామంలో జరుగుతున్న శ్రీ రేణుక ఎల్లమ్మ బ్రహ్మోత్సవాలు భక్తుల రద్దీతో ఆధ్యాత్మిక శోభను సంతరించుకుని ప్రాంతీయంగా ప్రత్యేక ఆకర్షణగా నిలుస్తున్నాయని
తెలిపారు.ఈ కార్యక్రమంలో తహసిల్దార్ పద్మ, ఎంపీడీవో వేద రక్షిత, ఆలయ చైర్మన్ వెంకట్ రెడ్డి,
ఈవో నాగిరెడ్డి ,మార్కెట్ కమిటీ చైర్మన్ జూకూరి రమేష్, తదితరులు పాల్గొన్నారు .