మోకాళ్ల నొప్పిని నిర్లక్ష్యం చేయొద్దు.. స్వేచ్ఛ,స్వతంత్ర జీవనాన్ని దెబ్బతీస్తుంది

చీకటి వెలుగు నల్లగొండ

డాక్టర్‌ సాయి దినేష్‌ తాటికొండ

వయసు పెరుగుతున్న కొద్దీ మోకాళ్ల నొప్పి రావడం సహజమేనని భావించి చాలామంది దానిని నిర్లక్ష్యం చేస్తుంటారని యశోద ఆసుపత్రి కన్సల్టెంట్‌ ఎముకల శస్త్రచికిత్స నిపుణుడు డాక్టర్‌ సాయి దినేష్‌ తాటికొండ తెలిపారు. అయితే మోకాలి కీళ్ల అరుగుదల (ఆస్టియో ఆర్థరైటిస్‌) కేవలం నొప్పికి సంబంధించిన సమస్య కాదని, క్రమంగా వ్యక్తి కదలికల స్వేచ్ఛను, స్వతంత్ర జీవనాన్ని దెబ్బతీస్తుందని వివరించారు.
ప్రారంభంలో మెట్లు ఎక్కడం, ఎక్కువ దూరం నడవడం వంటి పనుల్లో ఇబ్బందులు మొదలవుతాయి. క్రమంగా కుర్చీలోంచి లేవడం, నేలపై కూర్చోవడం, గుడికి వెళ్లడం, షాపింగ్‌ చేయడం, ప్రయాణించడం వంటి రోజువారీ కార్యకలాపాలు కూడా భారంగా మారతాయి. చివరకు ఇతరుల సహాయం లేకుండా బయటకు వెళ్లలేని పరిస్థితి ఏర్పడే అవకాశం ఉందన్నారు.
మోకాలి అరుగుదల ఉన్నంత మాత్రాన జీవితాంతం నొప్పితో బాధపడాల్సిన అవసరం లేదని పేర్కొన్నారు. తొలిదశలో బరువును అదుపులో ఉంచుకోవడం, తగిన వ్యాయామాలు చేయడం, శారీరక చికిత్స తీసుకోవడం, అవసరమైన మందులు వాడటం వంటి పద్ధతులతో నొప్పిని తగ్గించి కీళ్ల పనితీరును కాపాడుకోవచ్చన్నారు.
తీవ్రమైన నొప్పి ఉన్న ప్రతి ఒక్కరికీ శస్త్రచికిత్స అవసరం ఉండదని, అదే సమయంలో మోకాలి అరుగుదల తీవ్రంగా ఉన్నవారు శస్త్రచికిత్సను ఏళ్ల తరబడి వాయిదా వేయాల్సిన అవసరం లేదని తెలిపారు. రోగి వయసు, ఆరోగ్య పరిస్థితి, నొప్పి తీవ్రత, రోజువారీ జీవితంపై దాని ప్రభావం తదితర అంశాలను పరిగణనలోకి తీసుకుని చికిత్సను నిర్ణయించాల్సి ఉంటుందన్నారు. అవసరాన్ని బట్టి సూదిమందులు, నొప్పి తగ్గించే ఇతర విధానాలు కూడా ఉపయోగపడతాయని చెప్పారు.
అరుగుదల తీవ్రంగా ఉండి నొప్పి కారణంగా రోజువారీ జీవితం గణనీయంగా ప్రభావితమైతే మోకాలి మార్పిడి శస్త్రచికిత్సను పరిగణించవచ్చన్నారు. ఆధునిక మోకాలి మార్పిడి లక్ష్యం కేవలం కీళ్ల రూపాన్ని మార్చడం కాదని, రోగికి సాధారణ జీవనాన్ని తిరిగి అందించడమేనని వివరించారు. నొప్పి లేకుండా నడవడం, మెట్లు ఎక్కడం, కుటుంబంతో కలిసి ప్రయాణించడం, వ్యక్తిగత పనులను ఇతరులపై ఆధారపడకుండా చేసుకోవడం వంటి స్వాతంత్ర్యాన్ని తిరిగి పొందడమే చికిత్స ప్రధాన ఉద్దేశమన్నారు.
మోకాళ్ల నొప్పిని వృద్ధాప్యానికి సహజ పరిణామంగా భావించి వదిలేయకుండా, అది నడక, మెట్లు ఎక్కడం, కూర్చోవడం, నిలబడడం లేదా ప్రయాణం వంటి రోజువారీ పనులకు అడ్డంకిగా మారితే ఎముకల వైద్య నిపుణుడిని సంప్రదించి సరైన నిర్ధారణ పొందాలని సూచించారు. సరైన సమయంలో సరైన చికిత్స తీసుకుంటే మోకాలి అరుగుదల కారణంగా కోల్పోయిన కదలికల స్వేచ్ఛను తిరిగి పొందే అవకాశం ఉంటుందని తెలిపారు.