పెండింగ్ బిల్లుల చెల్లింపుకు డిమాండ్

జూన్ 18న “చలో హైదరాబాద్” కార్యక్రమాన్ని విజయవంతం చేయాలని కాంట్రాక్టర్ల పిలుపు

చీకటి వెలుగు, నల్లగొండ:

రాష్ట్ర ప్రభుత్వానికి చెందిన వివిధ అభివృద్ధి పనులు పూర్తి చేసినప్పటికీ బిల్లులు చెల్లించకపోవడంతో కాంట్రాక్టర్లు తీవ్ర ఆర్థిక ఇబ్బందులు ఎదుర్కొంటున్నారని, పెండింగ్ బిల్లులను వెంటనే విడుదల చేయాలని డిమాండ్ చేస్తూ జూన్ 18న హైదరాబాద్‌లో నిర్వహించనున్న “చలో హైదరాబాద్” కార్యక్రమాన్ని విజయవంతం చేయాలని కాంట్రాక్టర్ల సంఘం నాయకులు పిలుపునిచ్చారు.

ఈ మేరకు సోమవారం నల్లగొండలోని వెంకటరమణ బ్యాంకెట్ హాల్‌లో వాల్ పోస్టర్లను విడుదల చేసి సన్నాహక సమావేశం నిర్వహించారు. ఈ కార్యక్రమంలో ఆల్ ఇండియా పాస్ట్ ప్రెసిడెంట్ ఎస్.ఎన్. రెడ్డి, ఆల్ ఇండియా పాస్ట్ నేషనల్ వైస్ ప్రెసిడెంట్ డి.వి.ఎన్. రెడ్డి, రాష్ట్ర వైస్ చైర్మన్ సి.హెచ్. శ్రీనివాసరావు, రాష్ట్ర ట్రెజరర్ జి. సంతోష్ రెడ్డి, నల్లగొండ సెంటర్ చైర్మన్ వి. శ్రీనివాస్ రెడ్డి, మాజీ చైర్మన్ ఎస్. కృష్ణారావు తదితరులు పాల్గొన్నారు.

ఈ సందర్భంగా వారు మాట్లాడుతూ రాష్ట్రవ్యాప్తంగా సుమారు రూ.20,000 కోట్లకు పైగా పెండింగ్ బిల్లులు ఉన్నాయని తెలిపారు. బిల్లుల చెల్లింపుల్లో జాప్యం కారణంగా చిన్న కాంట్రాక్టర్లు తీవ్ర మనోవేదనకు గురవుతూ ఆర్థిక సంక్షోభంలో చిక్కుకుంటున్నారని ఆవేదన వ్యక్తం చేశారు.

డ్రెయినేజ్ పనుల నుంచి డ్యామ్‌ల నిర్మాణం వరకు వివిధ ప్రభుత్వ ఇంజినీరింగ్ శాఖల్లో చేపట్టిన పనులకు సంబంధించి బిల్లులు పెండింగ్‌లో ఉన్నాయని పేర్కొన్నారు. కాంట్రాక్టర్లతో పాటు ఉద్యోగులు, ఇంజినీర్లు, కార్మికులు, సరఫరాదారులు మరియు వారి కుటుంబాలు కూడా తీవ్ర ఇబ్బందులు ఎదుర్కొంటున్నాయని తెలిపారు.

పెండింగ్ బిల్లులను ఎలాంటి ప్రభావాలు, సిఫార్సులు లేదా వివక్ష లేకుండా సీనియారిటీ ప్రాతిపదికన పారదర్శకంగా చెల్లించాలని డిమాండ్ చేశారు. అలాగే ప్రస్తుతం అమలు చేయడం సాధ్యం కాని పనులను తాత్కాలికంగా నిలిపివేసి లేదా రద్దు చేసి, వాటికి సంబంధించిన డిపాజిట్లు, సెక్యూరిటీ డిపాజిట్లు మరియు పెండింగ్ బిల్లులను వెంటనే విడుదల చేయాలని ప్రభుత్వాన్ని కోరారు.

తెలంగాణ రాష్ట్ర అభివృద్ధిలో కాంట్రాక్టర్లు కీలక భాగస్వాములని, రోడ్లు, భవనాలు, సాగునీటి ప్రాజెక్టులు, తాగునీటి పథకాలు వంటి మౌలిక సదుపాయాల నిర్మాణంలో తమ వంతు పాత్ర పోషిస్తున్నారని పేర్కొన్నారు. నిర్మాణ రంగాన్ని కాపాడేందుకు ప్రభుత్వం పెండింగ్ బిల్లులను త్వరితగతిన విడుదల చేయాలని విజ్ఞప్తి చేశారు.

జూన్ 18న హైదరాబాద్‌లో నిర్వహించే “చలో హైదరాబాద్” కార్యక్రమానికి రాష్ట్రవ్యాప్తంగా ఉన్న కాంట్రాక్టర్లు, నిర్మాణ రంగ ప్రతినిధులు పెద్ద సంఖ్యలో హాజరై విజయవంతం చేయాలని నాయకులు పిలుపునిచ్చారు.