రైతులకు యూరియా, ఎరువులు సమయానికి – పారదర్శకంగా అందించేందుకు ఫర్టిలైజర్ యూరియా ఆన్‌లైన్ బుకింగ్ యాప్ ప్రారంభం

నల్గొండ, శనివారం:

రైతులకు అవసరమైన యూరియా, ఎరువులు సమయానికి మరియు పూర్తిస్థాయి పారదర్శకతతో అందించాలనే లక్ష్యంతో ఫర్టిలైజర్స్ యూరియా ఆన్‌లైన్ బుకింగ్ యాప్‌ను ప్రారంభించినట్లు జిల్లా కలెక్టర్ ఇలా త్రిపాఠి తెలిపారు.

శనివారం నల్గొండ జిల్లా కేంద్రంలో ఉన్న “మన గ్రోమోర్ – కోరమండల్ ఇంటర్నేషనల్ లిమిటెడ్” కంపెనీ కార్యాలయంలో ఈ యాప్‌ను జిల్లా కలెక్టర్ అధికారికంగా ప్రారంభించారు.

ఈ యాప్ ద్వారా రైతులు తమకు అవసరమైన యూరియాను ముందుగానే బుక్ చేసుకొని, సమీపంలోని డీలర్ వద్ద నేరుగా పొందే సౌకర్యం కల్పించబడిందని కలెక్టర్ తెలిపారు. ఇకపై ఎరువుల కోసం రైతులు క్యూ‌లో నిలబడాల్సిన అవసరం లేదని, ఎరువుల అక్రమ నిల్వలు, దళారుల బెడద గణనీయంగా తగ్గుతుందని ఆమె స్పష్టం చేశారు.

యాప్‌లో నమోదు చేసిన వివరాల ఆధారంగా యూరియా సరఫరా, పంపిణీలో పూర్తి స్థాయి పారదర్శకత నెలకొంటుందని, ప్రతి రైతుకు న్యాయంగా ఎరువులు అందుతాయని కలెక్టర్ పేర్కొన్నారు. రైతులు తమ మొబైల్ ఫోన్‌లో యాప్‌ను డౌన్‌లోడ్ చేసుకుని ఆధార్, భూమి వివరాలతో ఎరువుల కోసం నమోదు చేసుకోవాలని సూచించారు.

వ్యవసాయ అధికారులు, డీలర్లు రైతులకు యాప్ వినియోగంపై పూర్తి అవగాహన కల్పించాలని ఆదేశించారు. డిజిటల్ వ్యవస్థల ద్వారా వ్యవసాయ రంగాన్ని మరింత బలోపేతం చేయడమే ప్రభుత్వ లక్ష్యమని తెలిపారు. జిల్లా, మండల స్థాయిలో డీలర్ల వద్ద అందుబాటులో ఉన్న యూరియా వివరాలు ఈ యాప్ ద్వారా రైతులకు తెలిసేలా ఉంటుందని చెప్పారు.

ఈ యాప్ శాస్త్రీయంగా రూపొందించబడిందని, రైతుకు ఉన్న భూమి విస్తీర్ణాన్ని బట్టి ఎంత యూరియా అవసరమో యాప్ ద్వారానే నిర్ణయించబడుతుందని తెలిపారు. యాప్ వినియోగంలో ఏవైనా సమస్యలు లేదా చిన్న మార్పులు అవసరమైతే ఏవో లేదా జేడీ దృష్టికి తీసుకురావాలని కోరారు.

ఈ యాప్ ద్వారా బోగస్ కంపెనీలు, బ్లాక్ మార్కెట్‌ను అరికట్టవచ్చని, రైతులు ఎలాంటి అపోహలు నమ్మవద్దని కలెక్టర్ సూచించారు. అవసరమైతే రెవెన్యూ సిబ్బందిని కూడా వినియోగించుకుంటామని తెలిపారు. రైతులు ఈ ఫర్టిలైజర్ బుకింగ్ యాప్‌ను విస్తృతంగా ఉపయోగించి రాష్ట్రంలో నల్గొండ జిల్లాను నెంబర్ వన్ స్థానంలో నిలపాలని ఆమె కోరారు.

ఈ కార్యక్రమంలో రెవెన్యూ అదనపు కలెక్టర్ జె. శ్రీనివాస్, వ్యవసాయ శాఖ జేడీ శ్రవణ్ కుమార్, మార్కెట్ కమిటీ చైర్మన్ జూకూరు శ్రీనివాస్, పీఏసీఎస్ డైరెక్టర్ సంపత్ రెడ్డి, ఫర్టిలైజర్ డీలర్లు, రైతులు పాల్గొన్నారు.