చౌటుప్పల్ మున్సిపల్ కార్యాలయంలో ఘనంగా 77వ గణతంత్ర దినోత్సవ వేడుకలు

చౌటుప్పల్:

చౌటుప్పల్ మున్సిపాలిటీ కార్యాలయ ప్రాంగణంలో 77వ భారత గణతంత్ర దినోత్సవ వేడుకలు ఘనంగా నిర్వహించారు. ఈ కార్యక్రమంలో మున్సిపల్ కమిషనర్ జి. వెంకట్ రామ్ రెడ్డి జాతీయ పతాకాన్ని ఆవిష్కరించి, పట్టణ ప్రముఖులు, వివిధ రాజకీయ పార్టీల నాయకులు, మున్సిపల్ కార్యాలయ సిబ్బంది, పారిశుద్ధ్య కార్మికులతో కలిసి జాతీయ గీతాలాపన చేశారు.

ఈ సందర్భంగా కమిషనర్ మాట్లాడుతూ, డా. బాబాసాహెబ్ అంబేద్కర్ రచించిన రాజ్యాంగం దేశ ప్రజలకు సమాన హక్కులు, బాధ్యతలను కల్పించిందని, ఆ రాజ్యాంగ స్ఫూర్తితోనే మున్సిపల్ యంత్రాంగం పనిచేస్తోందని తెలిపారు. చౌటుప్పల్ పట్టణాన్ని ఆదర్శవంతంగా తీర్చిదిద్దేందుకు ప్రజలంతా రాజ్యాంగ స్ఫూర్తితో భాగస్వాములు కావాలని కోరారు.

ప్రత్యేకంగా పారిశుధ్యం, హరితహారం, మౌలిక సదుపాయాల కల్పనలో ప్రజల భాగస్వామ్యం కీలకమని ఆయన పేర్కొన్నారు. పారిశుద్ధ్యం, మంచినీటి సరఫరా, వీధి దీపాల వంటి సేవలను మరింత వేగంగా, పారదర్శకంగా ప్రజలకు అందించడమే మున్సిపాలిటీ లక్ష్యమని సిబ్బందికి దిశానిర్దేశం చేశారు.

ఈ సందర్భంగా కార్యాలయ ఉత్తమ ఉద్యోగులుగా ఎంపికైన సీనియర్ అసిస్టెంట్ సిహెచ్. దీప మరియు వార్డ్ ఆఫీసర్ కె. రామనారాయణమూర్తిలను ప్రశంసించారు. ప్రతి ఉద్యోగి విధుల పట్ల అంకితభావంతో పనిచేసి చౌటుప్పల్ మున్సిపాలిటీని ముందంజలో నిలబెట్టాలని సూచించారు.

అదేవిధంగా ప్లాస్టిక్ రహిత చౌటుప్పల్ నిర్మాణానికి ప్రతి పౌరుడు సహకరించాలని, తడి–పొడి చెత్తను వేరు చేసి మున్సిపల్ వాహనాలకు అందించాలని ప్రజలకు విజ్ఞప్తి చేశారు.

ఈ కార్యక్రమంలో **ఎఎంసీ చైర్మన్ ఉబ్బు వెంకటయ్య, వైస్ చైర్మన్ ఇంద్రసేనారెడ్డి, మాజీ వార్డు కౌన్సిలర్లు బాబా షరీఫ్, కొయ్యడ సైదులు, మున్సిపల్ మేనేజర్ శ్రీధర్ రెడ్డి, ఆర్‌ఓ అంజయ్య, రఘుపతి (సీనియర్ అసిస్టెంట్)**తో పాటు వివిధ రాజకీయ పార్టీల నాయకులు, కార్యాలయ సిబ్బంది, వార్డ్ ఆఫీసర్లు, బిల్ కలెక్టర్లు, పారిశుద్ధ్య సిబ్బంది, పట్టణ ప్రముఖులు పాల్గొన్నారు.