అరకు, పాడేరు ప్రాంతాల్లో భూకంపం

ఆంధ్రప్రదేశ్‌లోని అరకు లోయ (ఆంధ్ర ఊటీ)తో పాటు పాడేరు నియోజకవర్గంలోని పలు ప్రాంతాల్లో భూప్రకంపనలు సంభవించాయి.

శనివారం రాత్రి 11:31 గంటల సమయంలో భూమి కంపించగా, ప్రకంపనలు కొన్ని సెకన్ల పాటు కొనసాగాయి. ఈ ప్రభావంతో ఇళ్లలోని సామాన్లు కదిలి, కొన్ని చోట్ల చెల్లాచెదురుగా పడిపోయాయి.

ఒక్కసారిగా భూమి కంపించడంతో ప్రజలు భయంతో ఇళ్ల నుంచి బయటకు పరుగులు తీశారు.

ఈ భూకంప తీవ్రత రిక్టర్ స్కేలుపై 4.4గా నమోదైనట్లు నేషనల్ సెంటర్ ఫర్ సిస్మాలజీ వెల్లడించింది.

ప్రస్తుతం ఎలాంటి ప్రాణనష్టం లేదా భారీ నష్టం జరిగినట్లు సమాచారం లేదు. అధికారులు ప్రజలు అప్రమత్తంగా ఉండాలని సూచిస్తున్నారు.