బడ్జెట్‌లో బీసీలకు అన్యాయం: బీసీ ఇంటలెక్చువల్ ఫోరం ఆవేదన

నల్లగొండ: రాష్ట్ర బడ్జెట్‌లో బీసీ వర్గాలకు తగిన ప్రాధాన్యం ఇవ్వలేదని బీసీ ఇంటలెక్చువల్ ఫోరం తీవ్ర ఆవేదన వ్యక్తం చేసింది. జనాభాలో 56.35% ఉన్న బీసీలకు నామమాత్రంగా మాత్రమే నిధులు కేటాయించడం అన్యాయమని విమర్శించింది.

2026–27 ఆర్థిక సంవత్సరానికి బీసీల కోసం కేవలం ₹12,511 కోట్లు మాత్రమే కేటాయించారని, ఇది కంటి తుడుపు చర్యగా భావిస్తున్నామని ఫోరం పేర్కొంది. కేటాయించిన నిధులను సబ్‌ప్లాన్ ప్రకారం పూర్తిస్థాయిలో విడుదల చేయాలని డిమాండ్ చేసింది.

గత ఆర్థిక సంవత్సరం 2025–26లో కేటాయించిన ₹11,400 కోట్లలో కేవలం ₹3,500 కోట్లు మాత్రమే ఖర్చు చేశారని, మిగిలిన ₹7,900 కోట్లు వినియోగం కాకుండా ఉన్నాయని తెలిపారు. ఈ నిధులను మార్చి 31లోపు పూర్తిగా విడుదల చేయాలని ప్రభుత్వాన్ని కోరారు.

అలాగే బీసీ కార్పొరేషన్లకు తగిన బడ్జెట్ కేటాయించాలని, పెండింగ్‌లో ఉన్న ₹5,000 కోట్ల బీసీ స్కాలర్షిప్‌లను వెంటనే విడుదల చేయాలని డిమాండ్ చేశారు. ప్రస్తుతం 10,000 ర్యాంక్ లోపు ఉన్న విద్యార్థులకు మాత్రమే 100% ఫీజు రీయింబర్స్‌మెంట్ ఇస్తున్నారని, దీనిని అన్ని బీసీ విద్యార్థులకు వర్తింపజేయాలని కోరారు.

అన్ని రాజకీయ పార్టీల్లో ఉన్న బీసీ నాయకులు బడ్జెట్ పెంపు కోసం ఐక్యంగా పోరాడాలని, కేటాయించిన నిధులు పూర్తిస్థాయిలో ఖర్చు అయ్యేలా చర్యలు తీసుకోవాలని ఫోరం పిలుపునిచ్చింది.

ఈ సందర్భంగా బీసీ ఇంటలెక్చువల్ ఫోరం చీఫ్ కోఆర్డినేటర్ నేలపట్ల చంద్రశేఖర్ మాట్లాడుతూ, బీసీల అభివృద్ధి కోసం ప్రభుత్వం స్పష్టమైన చర్యలు తీసుకోవాలని కోరారు.