వడ్డీ లేని రుణాల పంపిణీ కార్యక్రమం – చౌటుప్పల్

తెలంగాణ రాష్ట్ర ప్రభుత్వం కోటి మంది మహిళలను కోటీశ్వరులను చేయాలనే సంకల్పంలో భాగంగా చౌటుప్పల్ పురపాలక సంఘం పరిధిలో మహిళా సంఘాల కోసం వడ్డీ లేని రుణాల పంపిణీ కార్యక్రమాన్ని నిర్వహించారు. సోమవారం చౌటుప్పల్‌లోని బీఆర్‌కే ఫంక్షన్ హాల్లో జరిగిన ఈ కార్యక్రమంలో మార్కెట్ కమిటీ చైర్మన్ ఉబ్బు వెంకటయ్య మరియు చౌటుప్పల్ మున్సిపల్ కమిషనర్ జి. వెంకట్రాం రెడ్డి పాల్గొన్నారు.

ఈ సందర్భంగా మున్సిపల్ కమిషనర్ మాట్లాడుతూ, 591 మహిళా సంఘాలకు రూ.1,28,11,337/- వడ్డీ లేని రుణాలు మంజూరు చేసినట్లు తెలిపారు. అదేవిధంగా, 450 సంఘాలకు మొత్తం రూ.33,25,00,000/- విలువైన రుణాలను వివిధ ప్రభుత్వ పథకాల ద్వారా అందించినట్లు వెల్లడించారు. ఈ రుణాలు మహిళలను ఆర్థికంగా స్వావలంబులుగా తీర్చిదిద్దడమే లక్ష్యంగా ప్రభుత్వం అమలు చేస్తోందని ఆయన పేర్కొన్నారు.

ఈ కార్యక్రమంలో అగ్రికల్చర్ మార్కెట్ కమిటీ వైస్ చైర్మన్ ఇంద్రసేనా రెడ్డి, డైరెక్టర్, మేనేజర్ శ్రీధర్ రెడ్డి, ఆర్‌ఓ అంజయ్య, సానిటరీ ఇన్స్పెక్టర్ హనుమాన్ ప్రసాద్, టీఎంసీ కవిత, ఆర్‌పీలు, మహిళా సంఘాల ప్రతినిధులు తదితరులు పాల్గొన్నారు.