బీజేపీ జిల్లా అధ్యక్షుడు నాగం వర్షిత్ రెడ్డిపై పార్టీ అధిష్టానం సీరియస్‌గా స్పందించింది.

నాలుగు రోజుల క్రితం నల్గొండలోని బీజేపీ పార్టీ కార్యాలయంలో బీసీ నేత పిల్లి రామరాజు యాదవ్‌పై నాగం వర్షిత్ రెడ్డి అనుచరులు దాడికి పాల్పడ్డ విషయం తీవ్ర దుమారం రేపుతోంది. ఈ దాడి నాగం వర్షిత్ రెడ్డి ఆదేశాలతోనే జరిగిందని ఆరోపిస్తూ పిల్లి రామరాజు యాదవ్, బీజేపీ రాష్ట్ర అధ్యక్షులు రామ్ చందర్ రావును కలిసి ఫిర్యాదు చేశారు.

ఈ ఘటనను పార్టీ అధిష్టానం అత్యంత సీరియస్‌గా తీసుకున్నట్లు సమాచారం. బీసీ సంఘాల నుంచి తీవ్ర వ్యతిరేకత వెల్లువెత్తడంతో, నాగం వర్షిత్ రెడ్డిని పార్టీ అధిష్టానం మందలించినట్లు తెలిసింది.

ఇదే సమయంలో, నాగం వర్షిత్ రెడ్డిని బీజేపీ జిల్లా అధ్యక్ష పదవి నుంచి తప్పించాలని పార్టీ క్యాడర్ డిమాండ్ చేస్తోంది. పరిస్థితిని దృష్టిలో ఉంచుకుని నాగం వర్షిత్ రెడ్డిపై శిక్షా చర్యలకు పార్టీ అధిష్టానం సిద్ధమవుతోందన్న ప్రచారం జోరుగా సాగుతోంది.