తమిళనాడు ఫ్యాక్టరీలో 364 ఉల్లంఘనలు – లైసెన్స్ రద్దు, యజమాని అరెస్ట్
భారతదేశంలో మరోసారి ఔషధ పరిశ్రమలో నిర్లక్ష్యం పెద్ద ప్రాణనష్టం కలిగించింది. కోల్డ్రిఫ్ (Coldrif) అనే దగ్గు సిరప్‌లో విషపదార్థమైన డైఎథిలిన్ గ్లైకాల్ (Diethylene Glycol) అధిక మోతాదులో కలిసినట్లు ల్యాబ్ పరీక్షలు నిర్ధారించాయి. ఈ సిరప్ సేవించిన చిన్నారుల్లో పలువురి మరణంతో దేశవ్యాప్తంగా ఆందోళన వ్యక్తమవుతోంది.
మధ్యప్రదేశ్ రాష్ట్రంలో 433 కోల్డ్రిఫ్ సిరప్ బాటిళ్లు ఫుడ్ అండ్ డ్రగ్స్ అడ్మినిస్ట్రేషన్ (FDA) అధికారులు స్వాధీనం చేసుకున్నారు. ఇప్పటికే 222 బాటిళ్లు విక్రయించబడ్డాయి, వాటిని వెతికి స్వాధీనం చేసుకునే చర్యలు కొనసాగుతున్నాయి.
ఈ సిరప్ తయారీ సంస్థ శ్రేసన్ ఫార్మాస్యూటికల్స్ (Sresan Pharmaceuticals) తమిళనాడులోని చిన్న ఫ్యాక్టరీలో ఉత్పత్తి చేస్తోంది. దాదాపు 14 సంవత్సరాలుగా ఈ ప్లాంట్‌లో నిర్వహణ జరగలేదని, యంత్రాలు రస్ట్ పట్టి లీకులు వస్తున్నాయనీ, పరిశుభ్రత పూర్తిగా లేకుండా ఉత్పత్తి జరుగుతోందని దర్యాప్తులో బయటపడింది.
తమిళనాడు ఆరోగ్యశాఖ ఈ కంపెనీపై చర్యలు తీసుకుంది. ఉత్పత్తి లైసెన్స్‌ను రద్దు చేయడంతో పాటు, యజమాని జి. రంగనాథన్‌ను అరెస్ట్ చేశారు. ఫ్యాక్టరీలో మొత్తం 364 ఉల్లంఘనలు, అందులో 38 తీవ్రమైన లోపాలు ఉన్నాయని అధికారులు గుర్తించారు.
ఈ ఘటనలో మధ్యప్రదేశ్‌లో 21 మంది చిన్నారుల మరణాలు చోటు చేసుకున్నాయి. కేంద్ర ప్రభుత్వం ఈ సిరప్‌ను “విషపూరిత ఔషధం”గా ప్రకటించింది.
ప్రపంచ ఆరోగ్య సంస్థ (WHO) కూడా భారతదేశంలోని ఔషధ పరీక్షా వ్యవస్థలో ప్రమాదకరమైన లోపాలు ఉన్నాయని హెచ్చరిక జారీ చేసింది.
తెలంగాణ రాష్ట్ర ఆరోగ్యశాఖ ప్రజలకు హెచ్చరిక జారీ చేస్తూ, రెండు సంవత్సరాల లోపు పిల్లలకు దగ్గు మందులు వైద్యుల సూచన లేకుండా ఇవ్వకూడదని స్పష్టం చేసింది.